Anvar G'aniyev - Otajonim

So’rab-so’rab, makkani topsa bo’ladi,
Yolg’iz bo’lsang, yakkani topsa bo’ladi,
Sirin sotgan, hakkani topsa bo’ladi,
Otajonim sizni qaydan toparman.
Mehribonim sizni qaydan toparman.

Shirin so’zlar topilur, shirin so’zlasam,
Ko’z o’ngimda namoyon, neni ko’zlasam,
Yig’lab-yig’lab, dunyoda sizni izlasam,
Otajonim sizni qaydan toparman.
Mehribonim sizni qaydan toparman.

Gul istasam, ketarman gulzor oralab,
Dur istasam, topardan zo’rin saralab,
Bilim gavhari sindi dilim yaralab,
Otajonim sizni qaydan toparman.
Mehribonim sizni qaydan toparman.

Qabringizni yoritsin duolarimiz,
Qulog’imga chalinar ovozlaringiz,
Dilga taskin bergay dil rozlaringiz,
Otajonim sizni qaydan toparman.
Mehribonim sizni qaydan toparman.

Torim tutsam dilni dard o’rganida,
Orzularim qoyasi nuraganida,
Farzandlarim sog’inib so’raganida,
Otajonim sizni qaydan toparman.
Mehribonim sizni qaydan toparman.