Hilola Hamidova - Shunchamidi

Dilbarim, la’l labing labmidi, g‘unchamidi?
Qirmizi rang yuzlaring yo shirmoyi kulchamidi?

Tob berolmay lol qolurman shahlolaring oldida,
Ko‘zlaringning shu’lasi lovullagan kunchamidi?

Aqlu hushim chirmagan kokillaring har tolasi,
Buncha ham tim qoradur, yo zim-ziyo tunchamidi?

Men vafodan so‘zlasam, ishvalaring jonim yoqur,
Hijronu sitamlaring ag‘yor kulgunchamidi?

Tunlari bedor kutgan gul-gul visoling muddati
Qayg‘u bilmas yuragim hijronga to‘lgunchamidi?

Yo‘llaringga ko‘z tutarman, nega boqmaysan manga,
Vaslingga zorligimning qimmati shunchamidi?